Senti che bel vento...... si cambia!

Senti che bel vento...... si cambia!

09/12/10

Interviste ai Luna e un Quarto

A son in siet e a son di Muzane. Chescj a son i prins indizis par cui che ancjemò a nol cognòs i Luna e un Quarto, une des realtâts plui interesantis de sene musicâl furlane.


Juste dopo da la lôr vitorie al Premi Friûl 2010, o vin pensât di fâi une piçule interviste par fausai cognossi plui di dongje....

Al Palamostre o vês vût un grant sucès, us ale spietaviso?

Balute: "Un pôc sì e un pôc no, o savevin che la nestre propueste e jere valide, ma tai concors no si sa mai..."

Boris: "Soredut intai moments finâi de serade nissun di nô a si spietave di sierâ in bielece. Chest parcè che in ogni câs chei atris grups a erin une vore energjics, preparâts cualitativementri e a tratavin ducj, tai tescj, tematichis origjinâlis e di spessôr. Cun di plui a jerin ducj grups metal, punk...rockettârs! A si sintivin un pôc "fûr dal coro", ma ale fin o sin rivâts a convinci la zurie e a concuistâ il public! une sodisfazion che no a presit!"

Davide: "O vin lavorât plui che podevin sui tocs di proponi al Premi Friûl, o crôt tant che ducj i grups partecipants. Ma o sintivin, in font, di vê une marce in plui: la Basse Furlane come element identitari che a nus unìs e a nus insiore, une consapevolece madurade intai agns di ognidun di nô e deflagrade in musiche".

Al Premi Friûl e an definît la vuestre musiche tant che "indreçade su atmosferis che van dal Mediterani ae bocje dal Mississipi", cualis sono stadis lis vuestris influencis musicâls plui impuartantis?

Davide: "Ancjemò in fassis o scoltavi i Led Zeppelin, che e an metût insiemi blues e rabie aes plui morbidis sonoritâts folk e mediteraniis. Ma ce cal è pasât al è pasât: i Luna e un Quarto a si voltin indaûr cun rispiet, ma in veretât a son plui atents a interogâsi su la funzion de musiche in dì di vuê, ae so fuarce agregant."

Boris: "Il fat di podê sunâ intun grup come i Luna e un Quarto a nus permet di meti in pratiche (o in musiche) dut, o cuasi dut, di ce che o vin imparât a apreçâ e a cognossi intal cors dai agns scoltant e sperimentant vecjis e gnovis musichis. E a vût grande impuartance la influence dal cjantautorat talian e di chel furlan e siguramentri la passion pe musiche balcaniche e dal est - Europe, ma poi ancje il jazz, il vecjo blues e il folk acustic...podaressin stilâ une liste lungjissime...in dut câs un gran numar di gjenars che a nus permet di vê un repertori une vore singolâr!"

Tai vuestris tescj and'è plui di un riferiment al Etiopie, cemût mai une tiere cussì lontane a tocje lis vuestris cjançons cussì di dongje?

Davide: "L'Etiopie, in particolâr, parce che il Balute a nus a puartât dongje emozions e calôr, vivûts in diferentis ocasions in chel paîs african. Se par tante int le Afriche a vûl dî aretratece, parcè che il P.I.L. nol é ai nivei dai stâts dal nord dal mont, par me e je invezit un model di cjalâ sot tancj ponts di viste, no dome musicâi, une ricjece che ca di non e jè aromai cuasit dal dut pierdude par vie dai modei culturâi che e an rindût l'omp prin di dut un consumadôr.Invezit o sin prime oms."

Balute: "La nestre musiche si base su temis "mondiâi", derivâts di varis viaçs fats individualmentri, l'Etiopie in particolâr la considerin une tiere lontane gjeografichementri, ma dongje al nestri cûr".

Il prin disc al è par solit un moment une vore impuartant par cui cal sune, ce ideis vêso pal vuestri prin lavôr?


Sergio: "Siguramentri e sarà une esperience gnove che nus puartarà a miorâ e a
jessi plui precîs intal sunâ. E sarà dure, intal cas cal sedi necessari, fâ une
cernite des cjançons, viodût che pal moment o vin 12 tocs. Al è un
pecjât lassâ fûr cualchidune... sperin di rivâ a cjatâ il just
compromès...".

Davide: "Il disc al scugnarà vê dentri chestis sugjestions e al sarà profondamentri gjenuin. A coventarà meti dentri la nestre personalitât e la nestre musiche, savint però che l'incuintri cun la int a si lu a dome dal vîf".

Boris: "O varin siguramentri di sclarîsi lis ideis e lavorâ a cjâf libar ma in maniere determinade. O vin za un repertori di 12 cjançons, e un pâr che a son in "costruzion" ma o pensi che la part plui interessant e sarà il lavôr in studi di regjistrazion, jessint ancje la nestre prime esperience e un sium cal si realize. O cirarìn, intal album, di mantignî sonoritâts naturâls e acustichis ma al stes timp energjichis par no vê un stac masse net cun lis esibizions dal vîf, solitamentri plui tiradis."

Prossime ocasion par scoltaus dal vîf?

Boris: "Sabide 11 di dicembar aes 20 e 30 alì de vecje sede dal circul "no fun" di Udin"


I Luna e un Quarto a son: Boris Sciacchitano (ghitare e darabouka), Jacopo Casadio (balalaika, ghitare soliste, vôs), Sergio Galasso (ghitare e banjo), Tomas Vergendo (vôs), Davide Sciacchitano (bas acustic), Alessio Turco "Balute" (armoniche), Cristian "Colete" Toneatto (batarie).


Par cure di Lorenzo Casadio

05/12/10

Il premi Friûl ai muzanês Luna e un Quarto


Compliments ai Luna e un Quarto che nosere e an vinçût il Premi Friûl 2010!

In curt su chest blog une interviste ae band...

01/12/10

Publicitât

"No tornarai mai plui a fidâmi de publicitât!"